Повеќе од 10.000 луѓе завчера се собраа на Универзитетскиот плоштад во Букурешт на протест против владиниот предлог за укинување на казните на илјадници затвореници. Демонстрантите сметаат дека со ослободувањето на некои затвореници ќе бидат уништени сите резултати на борбата против корупцијата која во Романија се води веќе неколку години.
Илјадници луѓе излегоа на протест и во другите градови во Романија како Клуж и во Јаши.
Демонстрантите извикуваа слогани против социјалдемократската партија која ја сметаат за корумпирана како и против предлогот на владата за ослободување на илјадници затвореници. Тие викаат „Црвена чума!“ и „Сакаме демократија, крадците во затвор“.
На протестот беше и претседателотот на државата Клаус Јоанис кој остро ја критикува владата.
“Банда политичари што имаат проблеми со законот сакаат да го ослабат законот. Затоа Романците со право се гневни”, порача Јоанис на протестот.
Преполнетоста на романските затвори е причината која Министерството за правда ја наведува како мотив за донесување закон со кој треба да се преполоват казните, без оглед на стореното криминално дело. Се предлага ослободување на затворениците повозрасни од 60 години, бремените жени и оние со мали деца. Владата вели дека со ова би биле ослободени околу 2.500 затвореници, особено оние со казни до пет години затвор.
Но демонстрантите сметаат дека ова е само оправдание на владата која сака да ги пушти од затвор сите оние осудени за корупција. Како медиумскиот могул Дан Војкулеску кој отслужува казна од десет години затвор поради перење пари.




