Најдоцна до утре на ЕНЕР ќе биде ставена драфт верзијата на новиот Кривичен законик со кој во целост се ревидира казнената политика. Во изготвувањето на законскиот текст учествуваа претставници од академската заедница, од судството, јавното обвинителство, Министерството за правда, невладини организации, МВР и други засегнати страни.
Во периодот кој следи, секој ќе има можност да се запознае со законските одредби, ќе се организираат јавни расправи, дебати, по што дел од забелешките ќе бидат инкорпорирани во конечното законско решение. „Одлучивме, концепциски тоа да биде на линија или согласно стратегијата за реформа на правосудниот сектор, да не се оди сегментарно во измените на Кривичниот законик, туку напротив, да се донесе комплетно ново законско решение кое ќе ги опфати сите сегменти на општественото живеење“, рече на прес конференција министерот за правда Никола Тупанчески.
Со новиот Кривичен законик, како што дополни Тупанчески, ќе се остави можност за индивидуализација на казните од областа на злоупотреба на службената положба, особено во делот на јавните набавки, конфискација на имот, еколошкиот криминал и други кривични дела. Во изработката на Кривичниот законик помогнале меѓународни експерти.
Во работната група за подготовка на законот учествувале 40 членови од повеќе засегнати институции, под водство на академик Владо Камбовски. Објаснувајќи ги измените министерот Тупанчески рече дека ќе бидат отстранети некои недоследности кои досега се провлекувале во законот.
„Се судиравме со апсурди за лесни кривични дела да има тешки казни и обратно за тешки кривични дела да има благи казни, и затоа комплетно е ревидиран системот во однос на санкциите. Главниот стандард е хирурши прецизно да се одреди квантитетот и квалитетот на правото“, рече Тупанчески. (С.К.)