-Имавме пет важни одредници од кои се водевме во изминатите 100 дена: Да ги вратиме парите кај граѓаните, да обезбедиме економски развој за подобар живот, да ги направиме институциите во служба на граѓаните, во сите наши одлуки граѓаните да препознаваат отворена и реформска влада и да ја промовираме нашата земја Македонија како пријател на соседите, која цврсто чекори на патот кон НАТО и ЕУ, истакна премиерот Зоран Заев на денешната прес-конференција по повод 100 дена од формирањето на Владата.
– Зборот сега е реалност. Дадениот збор се претвори во конкретна придобивка. Оваа Влада е влада на граѓаните и на нивните интереси. Ги препознавме тие интереси и креираме најдобри решенија за нив. Уште повеќе решенијата стануваат реалност, преточени во мерки од полза на граѓаните кои во исто време се инспирација за нови потфати, рече Заев во отчетот.
Во однос на враќањето на партите кај граѓаните, тој истакна дека Влада уште на стартот се соочила со големиот предизвик да направи ребаланс на Буџетот, во чие креирање, како што рече, таа не учествуваше.
– Наша задача беше да ги лоцираме непродуктивните трошоци и да најдеме начини парите да ги пренасочиме кон граѓаните и компаниите. Оваа Влада има намера да се однесува домаќински со парите на граѓаните. Само со кратење на премиерскиот буџет, обезбедивме 420 милиони денари. Обезбедивме дополнителни една милијарда и 245 милиони денари во Фондот на ПИОМ за да се обезбеди непречена исплата на пензиите и трошоците на вториот пензиски столб и уште 200 милиони денари, рече премиерот Заев.
Заев истакна оти е задоволен од резултатите кои ги постигнале откако претходно државата подолг период беше во тешка ситуација. Според него, отвориле многу процеси и работеле во атмосфера во која доминирала транспарентноста, а принципите според кои се воделе биле враќање на парите кај граѓаните, ставање на институциите во служба на народот и промовирање на Македонија како земја пријател на соседите.
– Ја вративме слободата, ќе го вратиме и животот – порача Заев.
Во отчетот пред јавноста за сработеното, премиерот се осврна на постигнатото во речиси сите сектори. Зборуваше и за, во моментот, најактуелното прашање во јавноста, претстојните локални избори. Посочи оти создале услови за спроведување на фер и демократски избори, му помогнале на ДИК да се екипира за да може да ги организира локалните избори итн.