Изборите продолжуваат. Нема никакви причини за какво било одложување. Безбедносните протоколи се прифатени од Државната Изборна Комисија (ДИК) и одобрени од ОБСЕ/ОДИХР. Навистина се совршено направени и граѓаните не треба да стравуваат ниту за кампањата, ниту за денот на гласањето, истакна лидерот на СДСМ, Зоран Заев.
Тој апелира до сите граѓани да излезат на гласање бидејќи така добиваат легитимитет институциите.
„Ако можеме да минеме пола час, час или два часа на пазар, во дуќан, во аптека, насекаде, во ресторан, во кафетерија, три до пет минути можеме да одиме да гласаме сите и да ја исполниме нашата граѓанска должност со сите здравствени протоколи што во целост ќе бидат обезбедени на сите гласачки места во државата“, изјави Заев.
Потенцира дека коалицијата „Можеме“ се придржува до пропишаните протоколи на средбите со граѓаните во предизборниот период.
„Тоа го правиме на најсериозен и внимателен начин со мал број на луѓе, до 50 се обично на отворени места. Максимално сме посветени тоа да го организираме однапред, кога се работи за теренски активности, па вчера дури се качивме на Пониква за да бидеме на воздух, на отворено и да биде на доволно широк простор. Насекаде сме на големи отворени парковски површини и слично, со цел да ја обезбедиме дистанцата. Маските се носат постојано. Секако дезинфекцијата се почитува максимално“, нагласи Заев.
Најави дека и натаму ќе водат максимална грижа за заштита на здравјето и здравствената безбедност на граѓаните, и повика на масовен одѕив на изборите на 15 јули.