„Не ми паѓа на памет да влијаам врз независноста на институциите и судиите, но треба да се помириме“, кажа Заев денеска на продолжението на собраниската седница за уставните измени.
Заев во реплика до пратеникот Крсто Јовановски се согласи со него дека само преку дијалог меѓу власта и опозицијата може да се стигне до договор.
„На лидерските средби прифатив претседателот на ДИК да биде од опозицијата, прифатив и техничка влада без никакви условувања, а за рефрендумот зборувавме дури на наредната лидерска средба – затоа што верував дека сите сме одговорни. Јас останувам на овој пат – Македонија мора да има иднина“, кажа Заев.
Пратеникот Крсто Јовановски од ВМРО ДПМНЕ кој гласаше на референдумот рече дека нема да гласа за владиниот предлог за пристапување кон измени на Уставот.
Тој ги повика Заев и Мицкоски да се договорат, затоа што партениците немаат мандат да гласаат за промена на Уставот.
„Ниту вие Заев сте пратеник, ниту претседателот на ВМРО ДПМНЕ Мицкоски е пратеник. Затворете се некаде 5 или 10 дена колку што треба и договорете се, па потоа дојдете овде да разговараме во Собранието“, кажа Јовановски.
Пратеникот се согласи дека општеството е поделено и „само искра може да те жигоса дека си предавник“, кажа Јовановски.
Постапката за пристапување кон уставните измени ќе ја поддржи Сурија Рашиди од Алијансата на Албанците .
„На Алијансата на Албанците и одговораат предвремени избори затоа што има поголема поддршка на терен од актуелниот број на пратеници кои сега ги има, но мислиме дека изборите треба да се одржат од кога ќе бидат усвоени уставните измени“, рече Рашиди.
За повикот на Заев за обединување, Рашиди кажа дека „е човечки да се прости, но и опасно, затоа што е спротивно на меѓународните институции кон кои се стремиме“, кажа Рашиди.