Различни нон пејпери за решавање на косовскиот проблем ме плашат бидејќи не зараснаа сите рани на Балканот. Кога ЕУ закочи со сите нас, штом ќе го забави нашиот процес на интеграција, не мислам само на Северна Македонија, туку и на Србија, Црна Гора, па дури и на БиХ и Албанија, се појавуваат некои нон пејпери, други, радикални идеи. И тие други идеи можат да завршат само со војни, на кој било друг начин“, вели во интервјуто за белградски Курир премиерот Зоран Заев, одговарајќи на прашањето за нон-пејперите, со кои се цртаат нови граници на Балканот, јави дописникот на МИА од Белград.
Тој во поглед на заканите од можни војни, оцени дека се надева да никогаш повеќе нема да има војни и оти треба да се продолжи со интегративниот процес, бидејќи во тоа е иднината.
На прашањето на Курир дали е загрижен за отвореното пропагирање на „голема Албанија” во нон-пејперите, во кои се наоѓа дел од Северна Македонија, Заев вели: „Никогаш не можам да кажам „не” со сигурност, но тоа би било тешко во Северна Македонија бидејќи сме членка на НАТО и со секоја закана за нашата територија и интегритет, би се активирал членот 5 од Договорот со НАТО, кој би нè заштитил – сите за еден, еден за сите. Сепак, не можам да кажам конечно „не” затоа што дефинитивно не знаете до каде некој тоа може да го испровоцира. И затоа решението е секоја земја да влезе во ЕУ. Кога ќе ги постигнеме шенгенските услови, тогаш ќе нема граници”.
Заев додаде дека „ако нешто е ризично за српскиот народ, јасно дека тоа е ризик за сите нас, бидејќи сите сме поврзани”.
„Кога регионот е стабилен и безбеден, тогаш и Северна Македонија е безбедна и стабилна. А кога регионот е нестабилен и има проблеми, тогаш и ние сме нестабилни и имаме проблеми. За нас, сè што е прифатливо за Белград и Приштина е добро, решение кое ќе гарантира мир на Балканот, европска интеграција, безбедност и иднина на сите етнички заедници што живеат на таа територија “, истакна тој.
Заев изрази благодарност до срскиот претседател Александар Вучиќ и премерката Ана Брнабиќ за помошта со 48.240 вакцини, кои се добиени „кога никој ги немаше, дури ни за Србија, што е чин на пријателство и братство, што макадонскиот народ никогаш нема да го заборави”.
Тој најави дека граѓаните на Србија од 25 јуни до 15 август нема да плаќаат патарини кога ќе патуваат низ земјава и дека проценката е да тоа ќе изнесува 2,5 милиони евра, иако вредноста на донираните вакцини е 700.000 евра.
Околу проблемот со Бугарија и блокадата на почетокот на преговорите со ЕУ, Заев кажа дека постои решение за сè, но треба да се избере вистинскиот момент.
„Кога на Балканот има избори, тоа се тешки моменти, тешко се решаваат проблемите, а избори сега имаше во Бугарија. Се разбираме исто како и со Србија, зборуваме слични јазици и верувам дека ќе најдеме разумно решение. Ние имаме заедничка историја, цела Европа има заедничка историја, а камоли на Балканот. Од таа иста историја се создадоа народи- македонскиот, српскиот, бугарскиот, хрватскиот“, одговори Заев.