Про-руски бизнисмени се обидуваат да ја спречат Македонија да се приклучи кон НАТО, така што финансираат насилни протести во земјава во пресрет на референдумот за името, изјавил премиерот Зоран Заев за БазФид Њуз. Заев тврди дека странци кои се поврзани со Русија, платиле илјадници долари за да се поттикне насилство со цел да се спречи Македонија да влезе во НАТО.

Заев рекол дека неговата влада добила повеќе извештаи дека „грчките бизнисмени” кои “се приврзаници на руската кауза” им платиле на Македонци суми во износ од 13.000 до 21.000 долари за „извршување акти на насилство” пред клучниот референдум оваа година, кој ќе утврди дали земјава ќе се приклучи на воениот сојуз.

Заев исто така вели дека на самитот на НАТО приватно побарал од американскиот претседател Доналд Трамп да му помогне за референдумот со кој треба да се изгласа промената на уставното име. Македонскиот премиер побарал од Трамп „да и помогне на нашата држава да има успешен референдум, затоа што нашите граѓани имаат демократско право да ја искористат оваа можност за да одлучат каква иднина сакаат да имаат“.

Премиерот, одбил да именува кој стои зад плаќањата, наведувајќи ја тековната истрага и чувствителноста на дипломатските односи околу кандидатурата на земјата за членство во НАТО. Но, потенцира дека полицијата дознала за плаќањата откако биле притворени неколку учесници во насилните протести пред парламентот во јуни.

Како што пишува BuzzFeed News портпаролката на руското Министерство за надворешни работи Марија Захарова засега не ги комнетирала изјавите на Заев.

Како што објави Фајненшел Тајмс викендов двајцата руски агенти кои беа протерани од Грција минатата недела, се обвинети дека преку бизнисмени се обиделе да  поткупат функционерите од локалната власт, православни свештеници, членови на културни здруженија и екстремно десничарските групи низ северниот дел на земјата, за да се вклучат во протести против Договорот потпишан меѓу двајцата премиери Ципрас и Заев минатиот месец.