Прогресивниот данок не ги даде очекуваните резултати од причина што земјава е опкружена со држави во кои даноците се многу ниски и генерално имаат рамен данок, истакна денеска Претседателот на Влада на Република Северна Македонија, Зоран Заев по денешното поставување на првиот електричен столб од новиот далековод од Штип кон Пробиштип. Смета дека е ретко некоја власт, чесно да истапи пред својот народ и да ја повлече оваа мерка.
„Признаваме дека прогресивниот данок не даде резултати. Ова е израз на чесно владеење, што ќе продолжи оваа Влада да го практикува. Заради тоа што постоиме и работиме за народот и секогаш е почесно да ги признаете грешките и да повлечете чекор назад, отколку буквално да продолжите во нешто од пусти каприц и само да покажете дека сте исправен во тоа што сте почнале како политика“, вели Заев.
Смета дека со овој потег се флексибилни кон стопанството и работниците, а анализите покажале дека капиталот е мобилен и овозможува отворање на сметки надвор од државата.
„Растот на персоналниот данок е повеќе од 14 проценти оваа година, но ова не се должи само на прогресивниот данок, туку заради тоа што имаме 54.000 нови работни места. Тие плаќаат персонален данок, заради тоа што платите растат, а расте и персоналниот данок за платите. Гледаме дека сме навлезени во еден ризик, којшто веројатно во едно несоодветно време, кога во целиот регион, скоро сите земји имаат рамни даноци и во време кога државата влезе неподготвена да ги заштити пред се информатичарите, интелектуалната класа или академска, која е со едно сериозно образование, генерира приход повеќе од 18.000 евра годишно или 1.500 евра месечно. Сето тоа на еден начин го стават во функција да отворат сметка во Косово, Србија, Бугарија и истовремено да ја премести својата компанија, вели Заев.
Премиерот истакна дека токму врз овие анализи за прогресивниот данок е можно и странските компании не се мотивирани да вложуваат во земјава, а пред се во високите технологии и информатичкиот сектор.