Во интервју за грчката „Алфа ТВ“, премиерот Зоран Заев вели, постои можност за изнаоѓање на решение за прашањето за името до крајот на првата половина во 2018 година, сметајќи дека „црвените линии“ нема да бидат причина или изговор за ограничување на разговорите.
Заев во интервјуто изрази уверување дека опозицијата во Македонија ќе даде позитивен придонес во изнаоѓањето на решение со Грција, истакнувајќи ја потребата заеднички да го решаваат ова прашање.
Прашан за „црвените линии“, македонскиот Премиер потенцира дека ако постојат такви, тие би биле само кочници во изнаоѓањето на решение.
„Наша црвена линија е линијата која свети силно како водилка по патот за да дојдеме до конечно решение“, вели Заев.
Тој вели дека со Ципрас веруваат во исти вредности.
Во интервјуто, Заев дополнува дека власта е подготвена да разговара за преименувањето на аеродромот во Скопје, со што, како што рече, ќе се покаже неговото пријателство со Грците.
Тој повтори дека Македонија не е единствен наследник на Александар Велики.
„Повеќе сакам да верувам во иднината на нашата држава отколку да бидеме вкоренети со предрасудите од минатото, затоа што знам дека Александар Велики ќе биде еден елемент што ќе нè обедини, а не елемент на поделба“, вели Заев.
Премиерот во интервјуто неведува дека стратешка цел на Македонија е влез во ЕУ и НАТО.