Претседателот на СДСМ Зоран Заев заедно со поранешниот директор на УБК Зоран Верушевски се на чело на колоната на денешниот тн Марш на слободата кој го организира најголемата опозициска партија.
Верушевски долго време не се појавил во јавноста пред, но и откако во јавноста изби скандалот со прислушувањето на десетици илјади македонски граѓани.
Во првата половина од 2015 Заев објавува аудиоматеријали за кои тврдеше дека биле снимени од страна на УБК по нарачка на Никола Груевски и Сашо Мијалков како дел од прислушување над 20 000 македонски граѓани. Тој и Верушевски, по објавувањето на материјалите или таканаречените „бомби“ кои открија корупциски скандали врзани со високи претставници на власта, беа обвинети за насилство врз највисоките државни органи, а Верушевски помина неколку месеци во притвор.
Како резултат на овие снимки, подоцна беше склучен Пржинскиот договор или Договорот од 2 јуни со којшто се формираше Специјалното јавно обвинителство кое истражува криминали кои произлегуваат од прислушуваните разговори, а коешто во моментов води случаи против високи функционери.