Површинскиот ангажман, без реална политичка волја за длабоки структурни промени, само го продлабочува чувството на стагнација, и ја поткопува довербата на граѓаните во европскиот пат.
Жанета Ќосе
Денешната прес-конференција на министерот за европски прашања Орхан Муртезани беше исполнета со бројки, активности и иницијативи, суштинскиот одговор на клучното прашање – до каде е исполнувањето на Реформската агенда до 30 јуни 2025 – остана изоставен. Наместо конкретна проценка на реализацијата по области како владеење на правото, јавна администрација или борба против корупција, јавноста доби генерализирана слика без индикатори, рокови или проценти. Во период кога земјата формално треба да биде подготвена за отворање на првиот кластер, фокусот останува на маркетингот, наместо на транспарентна и резултатска евалуација на реформите – што е клучно за довербата на граѓаните и на Брисел.
И покрај амбициозната реторика и најавите за „нов импулс“ во евроинтеграциите, под водство на премиерот Христијан Мицкоски, процесот на пристапување на Северна Македонија во Европската Унија останува во суштина заглавен. Наместо суштински напредок во исполнувањето на клучните реформски критериуми, јавноста сведочи на доминантно декларативен и PR-пристап, без јасни извештаи за напредок, индикатори на спроведени реформи или реален политички капитал вложен во отворање на кластерите.
Владата се обидува да прикаже административна активност и техничка подготвеност, со повлечени средства, институционални реорганизации и работни групи, јасно е дека таа упорно избегнува да се соочи со суштината: недостаток на конкретни реформи во владеењето на правото, непостојна борба со корупцијата и сè уште силно политизирана администрација. Површинскиот ангажман, без реална политичка волја за длабоки структурни промени, само го продлабочува чувството на стагнација, и ја поткопува довербата на граѓаните во европскиот пат.
Овој заглавен статус го открива и недостигот од лидерство и искрен ангажман за решавање на спорните прашања и демонстрирање на зрелост што би го откочило процесот. Наместо тоа, се создава илузија на напредок, додека суштинските услови што Брисел ги бара – остануваат несополнети.
Од Фејсбук ѕидот на авторката