Законот за медиуми наскоро ќе патува во Советот на Европа (СЕ) во Стразбург на проверка, дознава Нова од дипломатски извори во ЕУ. Ова паневрпоско тело е единственото кое има своја регулатива за слободата на медиуми и од тие причини СЕ е тој што ќе го прочита македонскиот предлог на законот.
Во Брисел ги следат реакциите на новинарите околу новиот закон, но прецизираат дека ЕУ не е иницијатор на новиот закон ниту пак тоа го барала од македонските власти. Улогата на ЕУ во медиумската сфера се ограничува на фиксирање на правила за одбрана на јавниот интерес како што се пазарот и лојалната конкуренција во оваа област.
Според проценките во Брисел законот има свои добри и лоши страни и оттука е важно нацрт текстот да го види тело како СЕ.
“Она што е важно е дека владата треба да почне да објаснува зошто е донесен законот и да го толкува. А новинарите се тие што треба внимателно да го прочитаат и да изнесат своите забелешки и прашање кои владата мора да ги одговори бидејќи е потребен консензус пред текстот на биде донесен“, вели еден дипломат во Брисел.
На денешната средба на новинарите со вицепремиерот за евроинтеграции Фатмир Бесими која тој ја организираше по повод 3 мај – светскиот ден на слободниот печат, новинарските организации побараа од вицепремиерот законот да се повлече, но и тој лично да се заложи текстот од предложениот закон за медиуми да се прати на експертиза во Советот на Европа.
Иако министерот средбата ја започна со предлог да се дискутираат глобалните тенденции на пад на слободата на медиуми во целиот свет кои ги забележала меѓународната организација Фридом Хаус во последниот извештај, претставниците на ЗНМ, ССНМ и ЦРМ, како и присутните новинари инсистираа да се разговара за законот за медиуми.
Вицепремиерот Бесими покажа волја да разговара со новинарите за законот, но остана на линијата на Владата дека тоа е закон кој Европа го бара од нас и им порача на здруженијата сите забелешки и коментари да ги достават до Министерството за информатичко општество.
Законот за декриминализацијата на клеветата кој се донесе минатата година беше испратен на експертиза во Советот на Европа.