Заменичкото место во Министерството за образование ќе остане празно се додека не биде избран новиот состав на ДИК. За оваа позиција е предложен Петар Атанасов кој во моментов е пратеник од редовите на СДСМ.
Владини извори потврдија дека Атанасов не е на списокот на предложени кандидати за заменици министри кој е доставен од Владата до Собранието.
Според партиски извори, ова место ќе биде пополнето кога ќе биде избран новиот состав на Државната изборна комисија, кој ќе треба да го верификува изборот на пратеникот кој ќе го замени Атанасов на местото пратеник. Атанасов беше избран за пратеник од првата изборна единица.
СДСМ го доби заменичкото место во образование, по рокадата меѓу СДСМ и ДУИ во министерствата за правда и образование. Рената Дескоска од образование преминува во правда, а досегашниот заменик министер за образование Арбер Адеми е предложен за министер во овој ресор.
Вчера пратениците ги изгласаа измените на Изборниот законик, со кои се уредува изборот и составот на Државната изборна комисија.
Според овие измени, власта и опозицијата се договорија ДИК да добие привремен состав со мандат од шест месеци, додека до октомври да се договори новиот начин на функционирање. ДИК ќе има седум членови, од кои претседателот и двајца членови на ДИК ќе бидат на предлог на опозицијата, а тројца од власта.
Новиот привремен состав на ДИК треба да се избере во рок од 30 дена од денот на влегување на сила на измените на Изборниот закон.