Запалени се фотографии на претседателот Иванов пред неговата канцеларија, од страна на демонстрантите и учесници на „Шарената револуција.“
Вечерва Народната канцеларија на претседателот Иванов и Министертвото за правда се повторно обоени. Неколку илјади демонстранти поминувајќи покрај овие објекти повторно фрлаа балони со разни бои, како симбол и дел од „Шарената револуција“ и мирниот протест кој вечерва започна во 18 часот пред Специјалното јавно обвинителство.
Демонстрантите извикуваат „Нема правда, нема мир“, свират со труби и свирчиња,а на протестот носат транспаренти на кои пишува„Аболиција или полиција за ова судство“ „Ова лудило мора да заврши“. Колоната демонстранти започнаа да се движат кон Собранието на Р. Македонија. Демонстрантите извикуваат кон полицијата„Дојдете со нас!“.
Демонстрантите обединети под граѓанската платформа „Протестирам“ бараат итно повлекување на одлуката за аболиција на сите оние против кои се води истрага и е покренато обвинение од Специјалното обвинителство. Се бара итна и неотповиклива оставка на Иванов од функцијата претседател на Република Македонија, произнесување на Уставниот суд за уставноста на Специјалното јавно обвинителство, како и формирање на специјално одделение во Кривичниот суд за случаите на СЈО.