По 37.пат стартува Интернационалниот фестивал на филмска камера „Браќа Манаки“. „Ослободување на Скопје“ е филмското дело кое свечено ќе го отвори фестивалот.
Овој филм се снимаше на повеќе локации низ Македонија а во режија на Раде и Данило Шербеџија.
Македонската премиера на „Ослободување на Скопје“ ќе ја следат легендарниот Раде Шербеџија, Луција Шербеџија и Силвија Стојановска, Мико Ноусаинен, Небојша Глоговац, Петар Мирчевски, Јари Вирман, Дејан Лилиќ, Денис Абдула, Аксел Мехмед и друга бројна публика.
На свеченото отворање, на оскаровецот Џон Сил ќе му биде врачена златна „Камера 300“ за животно дело, а писмо од Роби Милер ќе прочита Клер Пијман, негова соработничка и авторка на документарен филм за Милер.
– Првиот и најстариот фестивал на кинематограферите од светот ќе понуди исклучително квалитетна програма, а ќе одржат и свој конгрес. Тоа е потврда за концептот и рецептот за уште едно незборавно фестивалско издание, истакна директорот на ИФФК „Браќа Манаки“-Битола, Благоја Куновски пред вечерашното свечено отворање.
Фестивалската програма годинава ќе се реализира во повеќе објекти на националните културни установи во Битола како што се Музејот, Магазата и Центарот за култура во чии сали ќе бидат емитувани над 150 филмски проекции во различни категории.
Филмовите ќе ги оценува меѓународно жири предводено од Федон Папамихаил, годинешен добитник на специјална „Камера 300“ за особен придонес во светската филмска уметност.
– Фестивалот годинава се одржува под мотото „Почувствувај ја светлината, почувствувај ја Битола“, а свеченото отворање го режира Мартин Кочовски кој ангажира актери од битолскиот и прилепскиот театар, студенти од ФДУ и гимназијалци од овој град кои во своите перформанси ќе бидат придружувани од групата „Фолтин“.
Годинава се акредитирани над 120 новинари и други медиумски екипи од Македонија, но и од Словенија, Грција, Франција, Босна и Херцеговина и Србија.
„Браќа Манаки“ се одржува под покровителство на Претседателот на Република Македонија и со поддршка на Министерството за култура.