Фестивалот „Охридско лето“ вечерва за отворен ќе го прогласи претседателот на Република Македонија Ѓорѓе Иванов, кој е и покровител на манифестацијата.
На свеченото отворање на фестивалот ќе настапи светски познатиот баритон, оперската ѕвезда од Русија Дмитри Хворостовски.
Маестро Хворостовски, за чиј глас светската критика вели дека „мириса на луксуз“, на 12 јули ќе го разгори фестивалскиот оган од Античкиот театар, заедно со Оркестарот и Хорот на Македонската опера и балет, под диригентска палка на Константин Орбелиан.
Дел од возбудата што го носи фестивалот оваа година ќе бидат настапите на пијано дуото Корољеви, светски познатиот виолончелист Антонио Менезес, неповторливото виолинистичко име Немања Радуловиќ…
На годинешното „Охридско лето“ ќе настапи светската атракција, гудачкиот квартет „Бонд“ со целовечерниот гала-концерт што ќе се одржи на сцената на Античкиот театар на 27 јули.
Театарскиот дел од програмата на фестивалот ќе биде исклучително богата, со 11 театарски претстави, од кои речиси половината премиерни изведби.
Претставите „Мизантроп“ од Молиер во изведба на Турскиот театар од Скопје, „Спортска претстава“ според текст на нобеловката Елфрида Јелинек во изведба на „Џаст а маст“ театарот од Лондон, како и „Браќа Карамазови“ на Достоевски во изведба на Дубровачкиот театар „Марин Држиќ“, се само дел од годинешната театарска понуда.