Планот за заштита од пожари требало да го изработи и спроведе болничкиот персонал под раководство на директорот на болницата во Тетово, пишува Дојче Веле (ДВ) повикувајќи се на одговорот што за медиумот го дале од Светска банка (СБ), поврзан со пожарот кој изби во модуларната болница во кој загинаа 14 лица од кои 12 пациенти и двајца надворешни.

Од меѓународната кредитна институција, за ДВ објасниле дека, модуларната болница во Тетово била градена според меѓународните и домашните стандарди.

ДВ информира дека, од Светска банка не сакале да коментираат во врска со техничките спецификации на проектот по кој се градени модуларните болници во земјата.

„Очекуваме истрагата да даде дополнителни детали за техничката спецификација“, изјавил  портпарол на организацијата со седиште во Вашингтон, пренесува ДВ, дополнувајќи дека од таму укажале дека согласно нивните препораки сите нови згради треба да бидат дизајнирани, изградени и раководени во целосна усогласеност со локалните закони за градење и регулативи, и во согласност со меѓународно прифатени стандарди за заштита на живот и заштита од пожар. Дополнително, упатствата за јавни набавки на Светска банка прецизираат дека за сите меѓународни тендери, позајмувачот, во случајов Северна Македонија, мора да ги наведе меѓународно прифатени стандарди со кои опремата, материјалите и изработката ќе се усогласат, пишуваат од редакцијата на македонски јазик на ДВ.

„Меѓународниот стандард кој се следи во законската регулатива во Северна Македонија, велат од Светска банка, е оној на Конфедерацијата на европските здруженија за заштита од пожар КФПА Европа (CFPA- Confederation of Fire Protection Associations in Europe), објавува медиумот.

Најновиот патоказ на КФПА за протипожарна заштита на модуларни, привремени, објекти е издаден на 19 октомври 2020 година, точно три дена откако е објавена и Листата за проверки за модуларните болници на Светската банка, пишува Дојче Веле во денешниот текст посветен на ставот од светска Банка, истрагата и надлежностите за контрола на модуларните болници .