Затворениците во затворот Идризово бараат да ги пуштат надвор во дворот при секое тресење на земјата бидејќи стравуваат дека старата зграда во која што се сместени ќе им се урне над глава. Четирите столба веќе биле пукнати, а затворениците се плашат дека зградата која е стара повеќе од 100 години може да им се урне над глава.
Затвореници со кои контактираше НОВА тврдат дека за време на неколкуте потреси од земјотресот настанала голема паника, зидовите испукале и иако барале да ги пуштат во дворот вратите останале заклучени.
„Сакаме да не пуштат во дворот кога има земјотрес. Бевме во паника кога се случија двата силни потреси. Без разлика што сме осуденици, ние за тоа си ја издржуваме казната. Треба да не третираат како луѓе, да се почитуваат човековите права„изјави з а НОВА еден од затворениците. Тој отслужувал дел од казната и во странство и вели дека односот кон затворениците тука и таму е неспоредлив.
Дури синоќа кога поминал посилниот потрес кој се случи околу 20 часот, а затворениците се побуниле, чуварите ја отклучиле вратата. Денеска се повторно заклучени во нивните соби. Тие испратија неколку видеа, од кои се гледаат катастрофално лошите услови во затворските ќелии каде некаде престојуваат и по 13 луѓе заедно.
„Во ќелијата каде што престојувам сме седум луѓе но, тука се е испукано. При најмал потрес зградата ќе се урне врз нас“, вели друг затвореник.
Во Идризово постои уште една нова зграда, но затворениците велат дека таму не престојува ниту еден затвореник. Велат дека надлежните треба што побрзо ја оспособат и да ги префрлат таму.
НОВА се обрати до директорот на затворот Живко Пејковски, кој рече дека постојат протоколи во такви ситуации. Но, не објасни кои се тие протоколи кои важат за време на земјотрес.
„Има протоколи во такви ситуации, обратете се во Управата за извршување на санкции да ви објаснат“, рече кратко Пејковски.
Тој потврди дека новата зграда се уште не е пуштена во употреба бидејќи не била довршена целосно. Но, најави дека наскоро ќе профункционирала.