Повеќе од половина затвореници досега ставиле свој потпис на списокот на осудени лица кои бараат помилување од претседателот Ѓорѓе Иванов.
Барањата се од затворот Идризово и тоа од женското и машкото одделение, како и од Штип, но сепак нивните застапници очекуваат бројката денеска да расте со барања и од другите затвори ширум земјава. Затворениците не бараат целосно помилување, туку намалување на казните во зависност од волјата на претседателот, а списокот до крајот на денот ќе биде испратен до Иванов.
-Осудените лица кои бараат помилување се скромни, не бараат да им се прости казната, зависно од затвор до затвор бараат 30 до 50 проценти намалување на казната. Јас сфаќам дека ова во јавноста на еден начин ќе одекне дека криминалците се бара да се пуштат надвор – не е точно! Тие луѓе се осудени, за она што го сториле веќе ги издржуваат казните, но ниеден од нив нема таква доблест да бара укинување на казната. Свесни се дека згрешиле и бараат само намалување на казната. Треба да се има милост ако споредиме со оние на кои им е дадена. Ако имаше доблест да го направи она што го направи претседателот, мислам дека и овие луѓе заслужуваат, рече адвокатот Звонко Давидовиќ.
Затворениците посочиле дека доколку нивното барање не биде разгледано во разумен рок, тие ќе ги искористат сите законски можности за вршење притисок.
-Ќе го радикализираат полека протестот, штрајк со глад и ни беше кажано дека нема да одат надвор од законот. Нивните семејства нема да гласаат, а мислам дека и штрајкот со глад е извесен притисок, рече Давидовиќ.
Одлуката на Иванов за колективна аболиција на 56 лица, меѓу кои политичари од власта и опозицијата предизвика бура реакции во јавноста. Веќе втора недела по ред масовни протести против аболицијата се одржуваат во Скопје, а од вчера и во останатите градови ширум Македонија.