Од денеска повторно e можен влез во Вухан, главниот град на кинеската порвинција Хубеи. Меѓутоа, излезот од градот сè уште е оневозможен – вонредните мерки во таа насока ќе траат до 8 април. Со работа повторно почна подземната железница и другиот сообраќај на долги релации, а од наредната недела своите врати повторно ќе ги отворат и шопинг-центрите.
Голем број возови што денеска повторно влегоа во Вухан беа преполни, а местата беа резервирани претходно. Во салата на железничката станица во градот има долги редици, јави агенцијата „Франс прес“.
Жена на возраст од 36 години, која во Вухан се вратила заедно со ќерка си уште во текот на вчерашниот ден, за агенцијата АФП зборува со многу емоции, затоа што таа и детето биле разделени со сопругот и татко цели десет недели.
„Кога возот се приближи до Вухан, јас и детето бевме многу возбудени. Имавме чувство како возот да се движи побрзо од претходно, а ќерка ми рече дека возачот мора да знае дека навистина сакаме да се вратиме дома“, изјави жената, која признава дека не можела да ги задржи солзите кога детето се стрчало во прегратката на татка си.
Во текот на изминатите денови во Вухан беа отворени банките, а со возење почнаа и автобусите. Сепак, граѓаните и натаму имаат препорака од властите да не патуваат ако тоа не е неопхдоно, а постарите лица и натаму треба да го избегнуваат јавниот сообраќај.
Провинцијата Хубеи, која има околу 60 милиони жители, два месеца беше отсечена од надворешниот свет. Во текот на изминатите недели бројот на новоинфицирани, според официјалните бројки, значително се намали. Здравствените власти соопштија дека од коронавирусот денеска починале три лица. Во клиниките има уште 2.500 заболени, од кои 900 се „тешки случаи“.
Во Кина, според официјалните податоци, досега се потврдени 81.000 случаи на Ковид-19, од кои најголем дел во Вухан – 50.000. Бројот на починати од коронавирусот во Кина е 3.330 лица.
