Андерс Фог Расмусен, денеска се збогуваше со Северно-атлантската алијанса, со оглед на тоа што му заврши петгодишниот мандат и од 1-ви октомври ќе биде заменет со норвешкиот премиер Јенс Столтенберг.
По денешната церемонија во седиштето на Алијансата, Расмусен оствари средба и со Северно-атлантскио совет (НАК), каде во неговото последно обраќање до амбасадорите на земјите-сојузници во НАТО, им порача да ја штитат безбедноста и да ги бранат вредностите под знамето на НАТО.
Расмусен им се заблагодари на амбасадорите и делегациите на 28-те сојузници, како и на сите членови на меѓународниот секретаријат на НАТО и на меѓународниот воен штаб за нивната посветеност, професионалност и одлична тимска работа за време на неговиот мандат.
Својот мандат, пак, данскиот политичар го опиша како “најактивни и најпредизвикувачки години за НАТО”. Тој истакна дека способноста на Алијансата да се промени и да се прилагодува е она што ја прави толку силна.
– Ние го зајакнавме НАТО да биде поподготвен, побрзо и пофлексибилно, истакна Расмусен.
Данецот Расмусен беше 12-тиот генерален секретар на Алијансата и оваа функција ја презеде на 1-ви август 2009 година. Во својата кариера пред да дојде на чело на НАТО, како дипломиран економист во периодот од 2001 до 2009 година беше премиер на Данска, и претседател на данската Либерална партија. Претходно, тој минувал низ структурите на партијата, а од 1987 до 1992 година бил и министер за оданочување, како и министер за економски прашања на Данска, а одреден период и член на данскиот парламент.
Меѓу позначајните моменти што му се препишуваат е одлуката за повлекување на трупите на Алијансата од Авганситан, што ќе заврши до крајот на оваа година. Иако немаше директна вмешаност во Арапската пролет, Алијансата со Расмусен даваше поддршка за воведувањето на мир и демократија во Либија.
Расмусен ќе остане запаметен по тоа што бараше од земјите-сојузници да инвестираат повеќе во одбраната, како и по тоа што со неговото секретарување се случи да се доведе под знак прашалник и партнерството со Русија, што се случи поради ситуацијата со Украина, која мина со негови закани дека не е дозволиво мешање на Русите во внатрешните односи на земјите-соседи и дека НАТО силно ќе ги брани своите граници.
Во однос на Македонија, познато е дека тој неколку пати потенцираше дека “Македонија ќе влезе во НАТО, откако ќе го реши спорот за името со Грција”. Во однос на македонските интеграции во Алијанстаа, познато е и дека Расмусен повеќепати повтори дека пресудата на Меѓународнио суд на правдата не може да влијае на НАТО бидејќи “организацијата има свои правила на носење на одлуки”.
Андерс Фог Расмусен функцијата генерален секретар на НАТО ја презема од холандскиот генерал Јап де Хоп Шефер, а ќе биде наследен од премиерот на Норвешка, Јенс Столтенберг.