Украинскиот претседател Владимир Зеленски денеска изјави дека Русија во моментов контролира 20 отсто од територијата на Украина.
„Мораме да се браниме од речиси целата руска армија. Сите борбено подготвени руски воени формации се вклучени во оваа агресија“, рече Зеленски во видео-обраќањето пред Парламентот на Луксембург, пренесува „Ројтерс“.
Претседателот на Украина истакнува дека линијата на фронтот се протега на повеќе од 1.000 километри.
Според него Украина „де факто“ е членка на Европската Унија.
Јас верувам дека со своите постапки, Украина веќе покажува дека ги исполнува европските критериуми, додаде Зеленски.
Без да го спомне по име рускиот претседател, Владимир Путин, Зеленски побара да „се запре оваа индивидуа од уништување на европските вредности“.
Доколку не успееме заедно да го запреме овој човек, тогаш овие часови се темни, темни часови, што ние веќе ги доживеавме во Втората светска војна, истакна украинскиот претседател.
Зеленски повика за понатамошни санкции на ЕУ против Русија и за испорака на „повеќе оружје, модерно оружје“.