Државна комисија за одлучување во управна постапка и постапка од работен однос во втор степен ја потврди одлуката на Министерството за економија и го одби барањето на Еуромакс Ресурси за дозвола за експлоатација на руда во рудникот во Иловица – Штука.
„Еуромакс“ се жалеше на одлуката на Владата за одземање на концесијата затоа што компанијата не ги доставила сите потребни документи кои се бараат согласно Законот за минерални суровини за добивање на дозвола за експлоатација.
Од невладината „Еко долина“ сега очекуваат Владата да го раскине договорот со Еуромакс за рудникот во Иловица – Штука.
„Има симболика во денешниот ден – вера, надеж, љубов дека Македонија ќе остане здрава еколошка средина и нема дополнително да се загадува“ рече за НОВА Костадин Ристоманов – претседател на невладината организација „Еко Долина“, и човекот кој ги предводеше протестите против отворањето на рудникот Иловица – Штука.
„Еуромакс Ресурсис“ првата концесија ја доби во 2012 година, а во 2016 година пред истекот на законскиот рок достави барање за дозвола за работа, но Министерството за економија утврди дека компанијата не ги исполнила условите од Договорот.
Ристоманов очекува со решението на Државната комисија да стане правосилна одлуката на Владата и концесијата да биде одземена.
„Очекуваме во најбрз временски период Владата да донесе одлука за едностран раскин на договорот за концесија за експлоатација на минерална суровина со концесионерот Еуромакс Ресурси.
Ова е голема победа за екологијата во Македонија и вонредно значајна за југоисточниот регион“, вели Ристоманов.
Невладини организации и жители на Струмица, Босилово и Ново Село со месеци организираа протести против отворање на рудникот. Наспротив нив од компанијата уверуваа дека при ископувањето на руда ќе се користат сите модерни технологии за заштита на животната средина.
Владата на седницата на 4 јули донесе одлука да се одзeме концесијата на „Еуромакс“ за рудникот Иловица. Во информацијата која ја доставило Министерството за економија пишува дека компанијата не ги доставила сите потребни документи кои се бараат согалсно Законот за минерални суровини за добивање на дозвола за експлоатација. Поради ова „се одбива барањето за издавање на концесија за експлоатација на минерална суровина бакар и злато на локалитетот „Иловица“.