Доколку Грција излезе од еврозоната ќе ги избрка инвеститорите од Европа, смета претседателот на Европската комисија, Жан-Клод Јункер.
– Не го делам мислењето дека би имале помалку проблеми и притисоци доколку Грвија го напушти еврото, вели Јункер за германскиот дневен весник Sueddeutsche Zeitung.
Јункер денеска треба да се сретне со германската канцеларка Ангела Меркел и со претседателот на Франција, Франсоа Оланд на мини самит на кој ќе се разговара за надминувањето на проблемите со грчкиот долг.
Јункер, кој последните седмици активно се зазема за попуштање на тензиите меѓу новата влада на Грција предводена од радикалната левица и нејзините европски партнери, вели дека стравува дека евентуалното грчко напуштање на европската валута ќе создаде впечаток дека „еврото не е неповратно“.
Тој неодамна и во Јапонија разговарал со премиерот Шинзо Абе за грчката криза и му дал до знаење дека јапонските вложувања во Европа “зависат од довербата“ која единствената европска валута ги ужива во странство.
Атина и нејзините европски партнери настојуваат по европскиот самит кој се одржа на 19-ти и 20-ти март да го обноват дијалогот по повеќенеделните судири во кои повторно во прв план изби заканата за излегувањето на Грција од еврозоната.
Во почетокот на јуни, доаѓаат за наплата и двете транши од долгот кон Меѓународниот монетарен фонд (ММФ). Грција во периодот меѓу 5-ти и 15-ти јуни на ММФ мора да му врати четири заеми во вкупен износ од 1.6 милијарди долари, а првиот дел од исплатата на 5-ти јуни треба да изнесува 300 милиони евра.
Доколку не биде постигнат договор меѓу ЕУ и ММФ за новите заеми за Атина, Грција најверојатно нема да биде во можност да го почитува првиот рок за исплатата на 5-ти јуни, што би можело да иницира постапка којашто може да доведе до излегување на земјата од еврозоната.