Со меморандумот кој на 1. август го потпишаа министерот за транспорт и врски Горан Сугарески и неговиот бугарски колега Ивајло Московски, Македонија се обврзала да ја доизгради и модернизира пругата кон Бугарија, а Бугарија пак да ја заврши пругата до границата со Македонија.
Вкупната должина на трасата која треба да се комплетира до бугарската граница е 89 километри, ќе биде поделена на три делници и би требало да заврши најдоцна до 2026-та година. Бугарија се обврзала изградбата на пругата од Софија до македонската граница да биде финализирана една година потоа.
Куманово – Бељаковце е во фаза на реализација за што се обезбедени 46 милиони евра од ЕБОР. Треба да биде готовоа во 2018. За делот до Крива Паланка во должина од 34 километри почната е постапката за избор на изведувач и треба да се изгради до 2021. За неа Македонија доби грант од 70 милиони евра од ЕУ што е 46 отсто од вредноста на проектот. Остатокот ќе се финансира со кредит од ЕБОР.
Третата делница, 24 километри од Крива Паланка до Бугарија, во завршна фаза е изработката на проектна документација. Изградбата би чинела меѓу 350 и 400 милиони евра.
Средствата се обезбедени преку оперативната ИПА програма 2014-2020, но и преку меѓународни финансиски институции кои имаат пројавено интерес за финансирање.
Сугарески рече дека во завршна фаза се и основните проекти за пруга и до Албанија со должина од 66 километри, кои треба да бидат готови до крајот на годината. Потоа ќе се пристапи кон обезбедување финансии, а изградбата ќе чини околу 550 милиони евра. Со тоа би се заокружило железничкото поврзување долж Коридорот 8.