Дваесет жени од регионов, викендов во Охрид се собраа со цел да се запознаат и да се поврзат меѓусебно за заеднички да делуваат за зголемување на нивната застапеност во креирањето и носењето политики на локално и на национално ниво. Конференцијата „Иницијатива 50% родова еднаквост“ е иницирана од Либералниот Институт Скопје и Фондацијата „Борис Дивковиќ“ од Босна и Херцеговина. Ваков вид поврзување за заедничко делување на овој тип прашања и регионално, се одржа за прв пат кај нас, при што резултира со тезата дека во регионот може да се соработува и да се негуваат либералните вредноси, пишува „ Фокус“.
„ Жените треба максимално да се поддржуваат една со друга, а мажите треба да ги охрабрат. Треба да негуваме квалитет пред квантитет“ истакна во оваа прилика, извршната директорка на Либерален Институт Скопје, Санда Крекиќ.
За пратеничката Моника Зајкова од Либерално Демократска партија, родовата еднаквост е тема на која постојано и гласно треба да се говори. Како жени во политиката од регионот, треба заеднички да соработуваме за иницијативите да се спроведат на терен, вели таа.
„Очекувам поголема вклученост на жените во креирањето на локалните политики .Жените овде знаат и умеат да креираат политики за подобра држава“ изјави Зајкова.
За претседателката на Форумот на жени при ЛДП, Билјана Аврамоска Ѓореска , главната задаќа на форумот е да ги мотивира жените проактивно да се вклучат во политиката и да се изградат како зрели политички индивидуи.
„ Отворено дискутираме за сите прашања од интерес на жените но и за мажите. Форумот овозможува градење на капацитетите , промоција на жените, но и поддршка на законските измени кои се во насока на подобрување на положбата и статусот на жените во општеството.Ние треба да зборуваме гласно и да бидеме подготвени да ги разбиеме конзервативните стереотипи на политичко делување . Да се охрабриме и да се поддржиме меѓусебно во остварување на предизвиците“заклучи Аврамоска Ѓореска.
Фондацијата „Борис Дивковиќ“ спроведе регионално истражување и компаративна анализа што ја потврди ефективноста и ефикасноста на методите што ги користат ЛДП и Наша партија за зајакнување на политичките капацитети на жените и постигнување на родова еднаквост, вели Адиса Мемишевиќ. автор на публикацијата Политичко учество на жените во либералните партии во Западна Европа и надворешен соработник на фондацијата, пишува ,,Фокус“.