Три часа траеше денешниот распит на градоначалникот на општина Центар Андреј Жерновски во Специјалното јавно обвинителство (СЈО) за случајот со демолирање на општината во 2013 година. Првиот човек на општина Центар вели дека на обвинителите им приложил јасни докази дека во протестите учествувале луѓе блиски до владејачката партија ВМРО-ДПМНЕ.
-Од она што го приложивме како доказни материјали има многу јасен доказ дека во сите оние насилни протести учествуваа луѓе кои се блиски до ВМРО-ДПМНЕ, кои се членови регрутирани од јавните претпријатија. Имаше повреден советник, имаше причинета голема материјална штета, меѓутоа приложивме и фотографии за тоа како оние што масовно протестираа се заедно фотографирани и со Груевски, и со Јанкуловска и со претседателот Иванов, рече Жерновски.
Освен градоначалникот, на распит во СЈО се повикани и вработени во општината, за што практично СЈО најави преку соопштение дека во иднина во обвинителството ќе има „зголемена фреквенција на луѓе“.
По распитот, Жерновски упати директна порака до екс премиерот и актуелен претседател на ВМРО-ДПМНЕ Никола Груевски, дека наскоро ќе има шанса со него да се пресмета со него на суд.
-Јас навистина не знам каков боксер си бил ти, но дознав дека никогаш не си учествувал на некој боксерски меч. Затоа, бидејќи повеќе од очигледно е дека наскоро ќе имаме можност да се видиме во судница, а ти секогаш си праќал друг во боксерскиот ринг наместо сам да учествуваш, ќе имаме можност директно да се спротивставиш, да видиме колку си храбар, бидејќи повеќе од очигледно е дека имаме нерасчистени сметки, вели Жерновски.
По распитот на Жерновски, владејачката партија со писмено соопштение реагира дека Жерновски манипулира.
-Мераклиите за земање мито и рекет преку хаусмајстори и возачи може да се престават за се, освен за чесни луѓе. Најнеспособниот градоначалник во Македонија, во изминатите години наместо од работа и проекти политички опстојува од манипулации, лаги и политички флоскули. Кога беше претседател на партија не се одлучи сам со својата партија да излезе на избори бидејќи знаеше што го чека од граѓаните, па мораше да се врати во позицијата привезок на СДСМ.
Одамна е прочитан овој евтин интригант кој денес откако е сменет од претседател на неговата партија, од неговите членови тој е и целосно партиски маргинализиран. Му преостана само она што единствено го знае да плука, навредува и манипулира, се вели вореакцијата на ВМРО-ДПМНЕ по изјавата на градоначалникот.
Демолирањето на општина Центар се случи во јуни 2013, кога напаѓачите на општина Центар протестираа против, како што тврдеа, обидите на Жерновски да ја спречи изградбата на црква на плоштадот.
Демонстрациите беа насилни и завршија со демолирање на општинските простoрии. Зад протестите застана неформалното здружение „Веритас“.
Од нападот постоеја бројни видео снимки каде се гледаат лицата на луѓето кои ги демолираа просториите на општината. Полицијата никогаш никого не приведе за демолирањето на општината, а прозивки да си ја заврши таа работа доби дури и во Извештајот за напредок од 2014 година. По две ипол години, МВР објави дека истрагата за нападот е завршена и предметот е предаден во Обвинителство, но до денеска Обвинителството нема отворена никаква постапка за овој случај.
Демолирањето на општинските бараки се споменува и во една од бомбите кои ги објави опозицијата, според која, тогашниот премиер Никола Груевски, во разговор со поранешниот министер за транспорт и врски Миле Јанакиевски, нарачува и договара протест пред општина Центар во наводна одбрана за рушењето на новата црква, при што дел од донесените граѓани треба да влезат во салата на Советот и, пред сите советници и медиуми, да му “врзат три-четири јаки шамари” на тукушто избраниот градоначалник на општина Центар.
Жерновски вели дека за време на протестите, кога течеше и седница на општината, тој бил провоциран да излезе од седницата, по што имало физички контакт со демонстрантите, но не се оствариле „нарачаните шамари“.