Референдумот во Oпштина Босилово за отворање рудници е неуспешен. На 19-те гласачки места во оваa општина не излегоа потребните 6.151 граѓанин за да биде исполнет законскиот цензус за да референдумското изјаснување биде легитимнo.
Според првичните информации од избирачките места, речиси во секое населено место излезноста на граѓаните е под 50 отсто. Според неофицијалните резултати, што ги објави порталот Сакамдакажам.мк граѓаните кои излегоа на референдумот гласале против Иловица и отворање други рудници.
Неофицијално, до 19 часот на изјаснување излегле 40 отсто.
Од невладината „Здрава котлина“, која е иницијатор за референдумот, велат дека ваквиот исход е катастрофален и срамен. Најавија дека нема да се откажат од стопирање на рудникот за бакар и злато кај Иловица туку ќе поднесат барање до Владата и сите други институции да се направи ревизија на тој проект и ревизија на сите студии кои се преполни со работи кои се штетни за самата природа, човечкото здравје.
Референдум за рудникот кај Иловица ќе има и во Општина Ново Село, закажан е за 17 септември.
НОВА ТВ неколку пати побара од Владата да обелодени што содржи договорот за концесија и експлоатација на бакар и злато во рудникот во Иловица. минатата недела и министерот за економија Крешник Бектеши на прес конференција одби да го стави на увид на јавноста документот со Еуромакс Ресоурсес Лимитед, канадската компанија која што доби договор со претходната влада да вади злато во ова струмичко село.
Според него во него нема ништо спорно.
Договорот за рудникот Иловица и натаму под превезот на тајноста
НОВА ТВ се обиде договорот за концесија на рудникот Иловица да го добие од Министерството за економија согласно Законот за слободен пристап до информации од јавен карактер, но оттаму ни испратија допис со одговор дека „предметот е во постапка на усогласување при што доставувањето на содржината би предизвикало погрешно разбирање на содржината“.