Царовска истакна дека наставата со физичко присуство, која се спроведува од септември како најпосакувано од трите подготвени сценарија, покажува одлични резултати.
Тринеделниот зимскиот распуст ќе биде во редовниот период и нема потреба од негово поместување, бидејќи состојбата со ковид-19 и натаму е стабилна, оцени денеска министерката за образование и наука, Мила Царовска.
Таа нагласи дека доколку состојбата драстично се промени поради ризикот со омикрон и ако во други сектори се донесат други, драстични рестриктивни мерки, МОН тогаш има одговорност да ги разгледа тие факти и аргументи и, заедно со Комисијата за заразни болести, ќе донесе одлуки што ќе бидат во интерес на учениците и на заштита на јавното здравје.
Наставата со физичко присуство, според Царовска, која се спроведува од септември како најпосакувано од трите подготвени сценарија, покажува одлични резултати.
– Протоколите се почитуваат, се штити јавното здравје, учениците се со соодветни услови во училиштата. Скринингот направен од Министерството за здравство покажа дека состојбата е стабилна. Од сите училишта МОН дневно собира податоци и процентот на нови позитивни случаи не се зголемува повеќе од 0,3. Во последните недели не е ни повеќе од 0,02 проценти. Во еден момент, вкупниот број на активни случаи со ковид-19 кај ученици со физичко присуство во училиштата никогаш не надмина 0,3 проценти. Ова укажува на стабилна состојба и дека највисок интерес на децата е да бидат во училиште, појасни Царовска.