Режисерот и сценарист Кирил Ценевски е добитник на наградата „Златен објектив“ за 2013 година, која Кинотеката на Македонија ја доделува за исклучителен придонес во македонската кинематографија. Одлуката ја донел одборот за наградата, а беше соопштена денеска, кога Кинотеката одбележува 37 години постоење.
Наградата на Ценевски ќе му биде врачена на 27 октомври, на Светскиот ден на аудиовизуелното наследство, кога ќе биде прикажана ретроспектива на негови филмови. Тој е автор со голем број филмски награди, меѓу кои и тие за неговиот најнаградуван филм „Црно семе“ од 1971 година (на фестивалите во Пула, Москва, Авелино, југословенски кандидат за Оскар во 1972 и награда „11 Октомври“). Со „Црно семе“ Ценевски е влезен во листата на УНЕСКО „Спомени на светот“. Ценевски (1943) е режисер и на играните филмови „Јад“, „Оловна бригада“, „Јазол“…, и на документарци, меѓу кои и тие посветени на неколку добитници на „Златниот венец“ на Струшките вечери на поезијата, како и за самиот поетски фестивал.
– Имаше повеќе предлози за наградата и е многу тешко да се направи дистанца за заслугите, квалитетот и придонесот на секој од предложените филмски автори, но сметам дека одборот направи правилен избор зашто Кирил Ценевски е еден од најреномираните филмски режисери, рече директорката на Кинотеката Мими Ѓоргоска-Илиевска.
Од денеска до 2 мај во Кинотеката ќе бидат прикажани четири играни филма на годинашниот лауреат на „Златниот објектив“ Ценевски.