Владата и официјално ја донесе одлуката за амбасадори на Република Северна Македонија во Вашингтон, мисијата во ЕУ во Брисел и во Париз да ги именува Зоран Попов, Теута Арифи и Виктор Димовски.
Зоран Попов е актуелен државен секретар во МНР. Попов е дипломат од кариера кој пред назначувањето за државен секретар во 2017 беше во дипломатска мисија во Брисел. Попов има искуство и во меѓународните организации каков што е Регионалниот совет за соработка со седиште во Сараево.
Ова ќе биде прв амбасадорски мандат на Зоран Попов. Одлуката на Владата Попов да ја извршува оваа престижна дипломатска функција дојде по неуспехот во Вашингтон да биде испратен професорот Љубомир Фрчкоски. САД минатата година не ги прифатија агреманите на професорот Фрчкоски по што беше донесена одлука тој да биде испратен за шеф на мисијата во Обединетите Нации во Њујорк.
Инаку Македонија нема амбасадор во Вашингтон од 2018 до кога на таа функција се наоѓаше поранешниот вицепремиер за европски интеграции Васко Наумовски.
Во Брисел, во мисијата во ЕУ на местото на Агнеса Руси која е сега именувана за нов амбасадор во Софија заминува поранешната градоначалничка на Тетово, Теута Арифи. Теута Арифи беше и вицепремиерка за европски интеграции во една од владите на Никола Груевски. Ова е прва дипломатска мисија на Арифи.
На истата седница е потврдена и одлуката за амбасадор во Париз да биде именуван Виктор Димовски кој е актуелен директор на Агенцијата за национална безбедност. Димовски во својата долгогодишна кариера беше и амбасадор на Македонија во Белград. (Б.Ј.)