Јанко Бачав: Собранието ги усвои измените и дополнувањата на Кривичниот законик, а Сиљановска-Давкова Гордана го потпиша указот за прогласување на законот.
На прв поглед, ништо невообичаено. Но, токму овие дејства го спасуваат Мијалков и уште околу 200 лица од кривичен прогон поради настапена застареност.
Каква е врската меѓу законските измени и бандитите?
Во 2023 година, Владата на СДСМ донесе измени на Кривичниот законик со кои настапи застареност за кривичното гонење на Мијалков и уште околу 200 лица.
Законските измени беа оспорени пред Уставниот суд, кој на 12 февруари 2025 година реши да поведе постапка. Но, наместо да ги поништи измените, судот ја префрли топката во Собранието и му даде рок да одлучи за измените на Кривичниот законик.
Собранието вчера ги усвои измените на Кривичниот законик и тие ќе важат во иднина, што значи дека застареноста за Мијалков и останатите 200 лица останува.
Што ќе се случеше доколку пратениците не постапеа?
Доколку Собранието не расправаше и(ли) Сиљановска Давкова не го потпишеше указот за прогласување на законот, тогаш се отвораше патот законот да се врати на одлучување повторно кај Уставниот суд и судот мораше да донесе одлука.
Поништувањето од страна на Уставниот суд доведува до неважност на измените на Кривичниот законик од моментот на нивното донесување во 2023 (ex tunc) и се смета дека законските измени никогаш не постоеле, немаат правен ефект и се поништуваат правните последици што настапиле.
Според тоа, со поништувачката одлука на Уставниот суд ќе отпаднеше застареноста, а кривичните постапки против Мијалков и дружината од околу 200 лица, повторно ќе продолжеа таму каде што беа прекинати. На пример, во случајот Мијалков – во фаза на жалба пред Апелациониот суд откако претходно беа донесени три осудителни пресуди од Основниот кривичен суд Скопје против Мијалков на вкупна казна затвор од 28 години и конфискација на украденото.
За жал, Собранието и Сиљановска-Давкова практично го стопираа продолжувањето на овие постапки и обезбедија спас за Мијалков и групата од околу 200 лица.
Извор: Фејсбук