„Немаме ништо повеќе да додадеме на она што веќе го кажавме“, ова е одговорот на Американската амбасада во Македонија откако НОВАТВ праша кој е нивниот одговор на прашањето на ВМРО-ДПМНЕ јавно да одговори дали е против идејата на партијата за нови избори.
Амбасадата на САД во понеделникот, ден по неуспехот на ВМРО-ДПМНЕ да формира влада, соопшти дека го набљудува процесот на формирање влада и ги повика партиите да продолжат со разговорите за формирање нова влада.
„Очекуваме да работиме со македонската влада, кога ќе се формира, за напредување во евроатланската интеграција преку спроведување на реформите предвидени со Договорот од Пржино, особено во однос на владеење на правото“, велат од Амбасадата на прашањето како ги коментираат последните случувања и неуспехот на ВМРО-ДПМНЕ и ДУИ да се договорат и да формираат влада.
Вчера ВМРО-ДПМНЕ побара од Амбасадата, јавно да каже дали е против идејата на партијата да се одржат нови избори.
Еден ден откако ВМРО-ДПМНЕ јавно се произнесе дека ситуацијата во Македонија е зрела за нови избори, Амбасадата на САД во одговор на новинарско прашање ги повика партиите да ги продолжат разговорите за формирање на нова Влада. ВМРО-ДПМНЕ бара појаснување дали нивната позиција значи дека САД сугерираат и бараат од Република Македонија и од партиите во парламентот да нема нови предвремени парламентарни избори и дали овој повик може да се толкува како официјален став на новата администрација во САД, се вели меѓу другото во соопштението на ВМРО-ДПМНЕ.
Откако не успеа да формира влада, партијата вечерта во неделата побара нови избори бидејќи, според нив, штом тие не успеале како партија со најмногу пратеници да формираат мнозинство, тогаш не би требало други партии тоа да можат да го направат.