По завршувањето на јавната седница на членовите на ДИК, на која расправаа за дополнителните надоместоци за локалните избори и по прашањата на новинарите зошто седницата не беше јавна, членовите на ДИК прстот го вперија во стручната служба на Комисијата, која како што рекоа тие, затоа што не ја информирала јавноста.
НОВА дознава од високи извори во ДИК, дека токму на тајната седница на која членовите ја носеле одлуката, стручната служба била отстранета, па оттаму и немало информација за јавноста, ниту пак на официјалниот сајт на ДИК.
Во прилог на видеото, на 3:08 минута, на прашањето на новинар зошто баш оваа одлука за надоместоците не била објавена на сајтот на ДИК, потпретседателот Реџеп Прекопуца посочува дека прашањето требало да се адресира кон службата.
Од новинарите исто така, по завршувањето на расправата имаше неколку прашања, во однос на тоа зошто се одбиени барања за информации од јавен карактер на разни медиуми, но членовите на ДИК рекоа дека истите биле одбивани без нивно знаење, односно дека за тоа е одговорна службата.
Тие денеска взаемно ја правдаа одлуката за надоместоците, дека истата била законска бидејќи четири месеци додека решавале по прашања поврзани со изборите, не виделе „ниту празник ниту делник“ и дека работеле прекувремено и за време на викенди, но на крај поради притисокот од јавноста, одлучија истите да ги вратат индивидуално.
Бидејќи не постои правна регулатива за отповикување на одлуката, членовите решија самите да одлучат дали парите ќе ги вратат во буџетот или ќе ги донираат во хуманитарни цели.
Стручната служба на ДИК, која ја води генералниот секретар Добре Јанчев е присутна на секоја седница на ДИК, по што изготвува записник за редоследот и текот на седницата, но не и на последната седница која се одржала тајно, без присуство на јавноста.
Случајот со висината на дополнителните надоместоци на ДИК во јавноста излезе по вчерашната изјава на американскиот амбасадор Џес Бејли, кој на предавање посветено на борбата против корупцијата кое се одржа на Факултетот за безбедност – Скопје рече дека слушнал дека членовите на ДИК си изгласале дополнителна плата за работата која ја завршиле за локалните избори во октомври.
– Слушнав дека членови на ДИК си изгласале дополнителна плата за четири дополнителни месеци за нивната работа на октомвриските избори кои штотуку завршија. Тие претходно дополнително добиле плата и за пет месеци по изборите од 2016 година. Гласањето во Комисијата било едногласно, сите партии, сите етникуми, а персоналот во Комисијата добил помали бонуси. Јас сум јавен службеник, поддржувам наградување на јавни службеници кои работат повеќе од предвиденото, но имам прашање во врска со ова. ДИК е независно тело. Можеби овој потег бил дури и легален, но гласањето се случило зад затворени врати, рече Бејли.