Дополнителниот заменик-министер за труд и социјална политика, Диме Спасов, вечерва ги избегна новинарските прашања по дадениот исказ во полициската станица во Карпош.
Тој пристигна во станицата околу 20 часот за полициска забелешка по синоќешните случувања откако според записникот, удрил со службен џип во два автомобила, по што побегнал.
Вечерва пак, возило со затемнети стакла влезе во дворот на полициската станица во Карпош што му овозможи на Спасов да ги избегне новинарските екипи кои чекаа државниот функционер да одговори на прашањата кои се важни поради неговата јавна функција.
Дополнителниот заменик-министер синоќа го сопрела полицијата во скопската населба Тафталиџе, каде што побегнал откако им одговорил на полицајците дека тој управувал со возилото.
Во денешниот билтен на полицијата, МВР информира дека еден час по настанот, неговиот службен возач се пријавил да преземе одговорност тврдејќи дека тој управувал со џипот, но истиот не го затекнале во возилото а и неговата изјава не се совпаѓала ниту со таа на сопатничката која останала сама во возилото откако Диме Спасов побегнал.
Неговиот кабинет пак, писмено реагираше дека медиумите му го нарушувале угледот и тој не направил „тешка сообраќајна незгода“.