Фестивалот за европска литература „Букстар“ (BookStar) почетокот на своето единаесетто издание ќе го означи денеска во Културно – информативниот центар во Скопје со почеток во 19:30 часот. Ќе трае до 2 октомври. Главните настани ќе се одвиваат во Културно – информативниот центар во Скопје, меѓутоа дел од програмата ќе се одвива и на други локации, информираат организаторите на настанот.
Годинашниот фестивалски слоган гласи „За писателцките работи“, а својот корен го има во делото на Крсте Мисирков (1874 – 1926), во пресрет на јубилејот сто години од неговата смрт (2026).
– „BookStar“ во фокусот на својот интерес годинава ја става токму домашната литература и предизвиците со кои таа се соочува. Слоганот е непосредно инспириран од делoто на Мисирков, а индиректно од неговите ставови и начинот како ги претставува и елаборира. Тој не само што поставува основи на македонскиот јазик и современата македонска книжевност, како и на културната и националната самосвест, туку и прикажува интелектуален и пишувачки габарит каков што ретко сме виделе во нашата средина. „За писателцките работи“ е повик кон разговор за суштината на пишувањето, за одговорноста и слободата на авторот, но и за интимната, често невидлива, работа што стои зад секое напишано дело и што понекогаш носи судбински промени за писателот и за средината каде создава. Слоганот е мост меѓу традицијата и современоста, меѓу македонскиот Дон Кихот и денешната европска книжевна сцена како „melting pot“, создавајќи контекст каде читателите ќе можат да ја доживеат литературата во еден жив, актуелен, моќен и ангажиран чин, се наведува во писмената изјава на организаторите од издавачката куќа „Антолог“.
Се осврнуваат и на лицата кои македонската публика ќе има можност да ги сретне.
– Годинава во фокусот се голем број македонски имиња, па публиката ќе има можност да чуе бројни разговори со Калина Малеска, Блаже Миневски, Александар Прокопиев, Ермис Лафазановски, Владимир Мартиновски, Оливера Ќорвезироска, Жарко Кујунџиски, Михајло Свидерски, Дијана Петрова, Иван Шопов, Сања Михајловиќ-Костадиновска, Иван Антоновски… И годинава на овој фестивал доаѓаат светски имиња од светот на книжевноста, па македонската публика ќе има можност да ги види Петра Клабоухова (Чешка), Серај Шахинер (Турција), Шоле Резазаде (Холандија/Иран), Онджеј Штиндл (Чешка), Мајнхард Раухенштајнер (Австрија) и Ахмет Умит (Турција), се додава во соопштението.
За време на фестивалските денови, според најавеното, ќе се одржат бројни настани, поткасти, разговори, средби со млади читатели, потпишување книги.
Екслузивен настан годинава ќе биде „На кафе со Ахмет Умит“, што ќе се одржи на 2 октомври во „Рамстор мол“. Влезот на сите книжевни настани е бесплатен. Во рамки на фестивалот ќе биде доделена и наградата „Драги“ за најдобар превод на македонски јазик, се додава во соопштението.