Владина делегација денеска му оддаде почит на трагично загинатиот претседател Борис Трајковски, положувајќи венец на спомен-обележјето во Ротимље, во близината на Мостар, (БиХ), каде Трајковски и делегацијата загинаа во авионска несреќа.
Владината делегација ја сочинуваа министерот Зоран Шапуриќ, министер без ресор, задолжен за регулатива за подобрување на инвестициската клима за домашните претпријатија и заменик-министерот за локална самоуправа Дејан Павлески.
На настанот во Ротимље, министерот Шапуриќ истакна дека „сме на чекор од исполнување на визијата на Борис Трајковски, Македонија да биде слободна и демократска држава интегрирана во Евро-атлантските структури“.
-Тоа ќе биде најдобар начин да го исполниме заветот на прерано починатиот Трајковски, со што не само Македонија туку и целиот регион ќе биде посветен на градење на добрососедски односи засновани на доверба и искрени намери, со крајна цел да им се обезбеди подобар животен стандард на сите граѓани на овој дел од Европа, рече Шапуриќ.
Годишнината од смртта на претседателот Трајковски е одбележана со високи воени почести и на градските гробишта во Бутел, (Скопје), во Алејата на великаните, каде владината делегација положи венец на вечното почивалиште на поранешниот претседател на РМ и оддаде почит на другите загинати во авионската несреќа.
Во чест на Борис Трајковски, кој беше втор претседател на РМ, од 15 декември 1999 година до 26 февруари 2004 година со должна почит и признание за неговиот исклучителен придонес во создавањето и негувањето на придобивките од независноста на Република Македонија, претставници на Владата положија цвеќе и му оддадоа почит пред споменикот на поранешниот претседател Борис Трајковски во Струмица.
Кобниот ден и истрагите потоа
Во авионска несреќа што се случи на 26 февруари 2004 година загина претседателот на Република Македонија Борис Трајковски и осумчлена македонска делегација која патуваше на Меѓународна конференција во Мостар.
За несреќата која се случи во атарот на Матиќ Брдо кај селото Хусковиќи, во близина на Мостар, за причините за падот на „кингерот“, за тоа дали се случила авионска несреќа или било „тероризам“, од тогаш досега беа изврешени две истраги и објавени два извештаја, на две комисии со кои раководеа Салко Бегиќ и Омер Кулиќ, а во кои учествуваа и македонски експерти.
И во двата извештаја, кои се разликуваат, сепак, како причина за падот на „кингерот“ се наведуват пилотски грешки и други индиректни системски пропусти.
На барање на Македонија, со поддршка од европратеникот Андреас Грос, по собирањето на дополнителните докази од страна на македонското МВР беше отворена нова истрага во јануари 2013 година која ја водеше Кулиќ.
Во првиот извештај како директна причина за падот на „кингерот“ се наведени „процедурални грешки во приодот за слетување, по висина и по место, на аеродромот во Мостар, на контролиран лет“. Во вториот се наведени и системските пропусти, а е објавен и транскриптот од црната кутија односно целиот разговор меѓу пилотите и разговорот со контролата на летање.
Седум постапки во текот на летот од страна на пилотите и пет системски грешки на надлежни институции во Македонија и во Босна и Херцеговина се причините за уривање на „кингерот“, стои во новиот извештај што го презентираше Кулиќ.
Македонската страна во целост ги прифаќа наводите со дополнителни предлози кои се однесуваат на ВОР системот, самата процедура, барањето и спасувањето по падот на кингерот и формулацијата за пловидбеноста на воздухопловот. Но, за македонската страна е нејасно зошто е пренасочена локацијата каде да се бара авионот, иако Кулиќ вели дека контролорот на летање знаел каде е урнат авионот.
Во авионската несреќа покрај претседателот Борис Трајковски, животот го загубија портпаролот Димка Илкова Бошковиќ, советниците Ристо Блажевски и Анита Лозановска, претставникот на Министерството за внатрешни работи Миле Крстевски, телохранителите Аце Божиновски и Борис Велиновски, како и пилотот и копилотот на авионот.