Денешното рочиште за случувањата во Собранието на 27 април 2017 година заврши со приложување на доказните материјали од вештачењето во Собранието.
Случајот се наоѓа во доказна постапка и продолжува утре.
Во претпладневниот дел беше гледана видео-снимка од мобилниот телефон, што е одземен од обвинетиот Оливер Попоски.
Од видео-снимката направена со мобилниот телефон се гледа како толпата почнува да влегува во собранискиот прес-центар, каде се наоѓаат пратеници и дел од нивното обезбедување. Се слуша како присутните извикуваат „Убијте ги, гадови”, како и измешани пцости. На снимката се гледа како обвинетиот Игор Југ стои во средина на просторијата и два пати се фаќа за темно сив предмет што се наоѓа одзади на десната страна од неговите панталони.
Се забележува како лицата неколкупати фрлаат со сталаци и метални ногарки кон пратениците и луѓето околу нив, како и обвинетиот Поповски зборува со член на обезбедувањето на премиерот Зоран Заев, во тоа време пратеник.
На снимката се гледа пратеникот Зијадин Села и како со црвен чадор се удира кон местото каде што стои тој. Потоа пратеникот се наведнува надолу и не се гледа, но се гледа замавнување со црвен чадор кон местото каде се наоѓа Села.
– Се гледаат повеќе лица на местото каде што стоеше пратеникот Села. Се гледа како лице со црвен чадор замавнува кон лице што не се гледа. Обвинетиот Јане Ченто го држи црвениот чадор, наведе обвинителката Вилма Русковска.
По одредено време се забележува Села со повреда на десната страна на челото.
Во попладневниот дел од денешното рочиште беа прикажани куси видеа, а потоа и фотографии од штетите направени во просториите на Собранието по „крвавиот четврток”.
Дамки од крв на подот, како и на делови од мебелот, искршени врати, бироа, маси, фотелји, разурнати ѕидови, дамки од обувки по ѕидовите, искршени камери и сталаци, расфрлени чанти, пари и лични документи, како и чаура од куршум, можеа да се забележат на видеата и фотографиите, што беа опишани од страна на обвинителката Вилма Русковска.