Една од најголемите рокенрол групи на сите времиња „Дип парпл“ (Deep Purple) на 28 мај ќе настапи на стадионот на АРМ во Скопје, во организација на „Авалон продукција“.
Македонската и регионалната публика ќе може во живо да ги слушнат класиците: „Smoke on the water“, „Hush“, „Strange kind of woman“, „Woman from Tokyo“, „Knocking at your back door“, „Highway star“ и уште многу други хитови што го одбележаа петдецениското постоење на овој легендарен бенд.
Првиот човек на „Авалон“, Бобан Милошески денеска на прес-конференција во Скопје најавувајќи го концертот изјави дека без разлика што членовите на Deep Purple се веќе навлезени во седмата деценија од животот, тие само во последни три години имаат издадено два албуми.
„’Дип парпл’ е еден од најпродуктивните рок и метал бендови во последнава деценија, без разлика на тоа што имаат по 75 години, тие само во последните три години имаат издадено два албума. И треба да престанат да се делат бендовите на млади и на стари. Актуелен е бенд којшто има нов материјал и од таа гледна точка доаѓањето на ‘Дип парпл’, значи доаѓање на еден од најголемите светски рок бендови на сите времиња“, рече Милошески.
Deep Purple се меѓу големата петорка заедно со „Битлси“, „Ролингстоунс“, „Пинк Флојд“ и „Лед цепелин“. Ова е прв концерт, со кој ја отвораат претстојната сезона, а предгрупа на легендарниот бенд, ќе биде млад македонски бенд, кој ќе биде изненадување.
„Се нудеа некои групи што се генерациски многу блиску со ‘Дип парпл’, ама ние одлучивме да биде млад македонски бенд а и ‘Дип парпл’ сакаа млад македонски бенд“, вели Милошоски.
Влезниците се пуштени во продажба уште на 23 февруари по цена од 1.500 денари партер и 2.000 денари за Фан пит.