Десетина земјотреси вчера го стресоа главниот град на земјава, од кои четири беа почувствувани низ целата територија на Македонија.
Утрото околу 7 часот најпрво земјотрес со јачина од 3,9 степени според Рихтеровата скала а веднаш потоа и втор со магнитуда од 2,1 степен ги разбудија скопјани, што пак се покажа како предвесник за многу посилниот земјотрес неколку минути по 15 часот, кога следеше земјотрес со јачина од 5,1 степени по Рихтеровата скала, со епицентарот на пет километри од центарот на градот во регионот на Скопска Црна Гора на длабочина од два километри.
Потоа до 18 часот регистрирани биле 10 послаби земјотреси, а последниот помал, со јачина од 2,1 степен според Рихтер, беше почувствуван во 21:46 часот според Европско-медитеранскиот сеизмолошки центар.
Во паниката при бегањето од земјотресот, околу педесетина граѓани на Скопје беа повредени а над 30 пациенти пријавиле скршеници на рацете и нозете и расекотини. Некои паднале по скали, други скокале од терасите од пониските спратови.
Во Ургентниот центар при Клиника примени се двајца работници кои за време на земјотресот околу 15.10 минути работеле во магацин.
Центарот за управување со кризи соопштува дека до 11 часот утрово имало 300 јавувања за штети од земјотресот, по што стручни лица на Институтот за сеизмологија заедно со претставници од општините денеска треба да направат увид.
Несомнено дека во меморијата на скопјани и понатаму се врежани последиците од катастрофалниот земјотрес во 1963, во кој над 1.000 луѓе загинаа а околу 3.000-4.000 беа повредени. Над 200.000 останаа без своите домови.
Многумина од нив, по силниот земјотрес околу 15 часот, ги напуштија домовите и седеа на отворено, стравувајќи да се вратат во своите домови, од нови можни потреси.
Некои, исплашени од земјотресите седеа во своите коли и избегнуваа да зборуваат пред камера, а имаше и такви кои ги пакуваа своите коли за ноќта да ја поминат на село, викендица или друг град.
Некои постари градби претрпеа помали штети како паднати керамиди, оџаци или мали одрони од фасадите.
Епицентрите на сите земјотреси вчера беа Скопје и околината.