Оваа година, за Нобеловата награда за мир се пријавени 318 кандидати, а добитникот ќе биде соопштен во петок во Осло.
Агенцијата Франс прес објави дека како и последните неколку децении не се знае кој е на списокот со кандидати, бидејќи имињата се држат во строга тајност, но гласините се дека овогодишната награда би можела да биде посветена на напорите против ширењето на атомското оружје во светлина на кризата со Северна Кореја.
-Нобеловиот комитет ќе направи голем пресврт доколку одлучи да го награди нуклеарниот договор на Иран со шестте големи сили, оценува норвешкиот историчар Асле Свен.
Според него, наградата би можеле да ја поделат поранешниот американски државен секретар Џон кери, шефот на иранската дипломатија Мухамед Џавад Зариф и високата претставничка на ЕУ за надворешна политика и безбедност Федерика Могерини, за придонес во постигнување на иранскиот нуклеарен договор, од јули 2015 година.
Аналитичарите, како лауреат го споменуваат и Високиот комесаријат на ОН за бегалци (УНХЦР) кој веќе ја доби оваа награда веќе два пати – во 1954 и во 1981 година.
Исто така гласините велат дека на списокот е и Папата Франциско, саудискиот блогер во затвор Раеф Бадауи и рускиот и турскиот весник – Новаја газета и Џумхуриет.
Нобеловата награда за мир минатата година ја доби колумбискиот претседател Хуан Мануел Сантос за напорите за постигнување на миовниот договор со бунтовниците.