Засилени вонредни контроли на Државниот инспекторат за труд за фирмите кои работат во недела.
59 работодавачи за месец и половина биле санкционирани поради непочитување на одредбите од Законот за работни односи за работа во недела кој стапи на сила на 1 јануари, откриваат за НоваТВ од Државниот инспекторат за труд. 11-мина од прекршителите добиле и забрана за работа во траење од 15 дена и глоби за непочитување на Законот за трговија.
„Изречени се 48 инспекциски мерки – опомена, за работодавачи кај кои согласно член 134 став 3 работниот процес е од таква природа што не може да се прекине поради техничко – технолошкиот процес и потребата од континуитет во работата и истите се должни пред започнувањето на работата да го известат Државниот инспекторат на труд, а истото не го сториле“, велат за НоваТВ од Инспекторатот.
Дежурните иснпектори од први јануари со сега спровеле над 270 вонредни иснпекциски надзори, а најчесто биле „чешлани“ субјекти кои се занимаваат со трговија на мало и угостителство, велат од Државниот инспекторат на труд.
„Извршени се инспекциски надзори и во дејностите транспорт, производство, земјоделие, производство на леб и бели печива, услужни дејности (во кои спаѓаат игрите на среќа) и други. За време на забраната за работа работодавачот е должен на работниците да им исплатува надоместок на плата во висина од исплатената плата по работник за претходниот месец и придонеси од плата и за време на забраната не смее да го намали бројот на вработени“, велат од Инспекторатот.
Министерката за труд и социјална политика, Јованка Тренчевска пред два дена, во одговор на новинарско прашање посочи дека инспекторите до крајот на овој месец ќе вршат увид кои од работодавачите не го испочитувале Законот и не исплатиле додаток за работа во недела на работниците, а фирмите прекршители ќе бидат јавно објавени на веб страницата на Државниот инспекторат за труд.
Вработени во компанијата РЕК Битола веќе се пожалиле во матичниот Синдикат дека со јануарската исплата не им бил платен додаток за работа во недела во висина од најмалку 50 проценти од дневницата за работен час. Од компанијата, за НоваТВ ја потврдија информацијата дека не исплатиле надомест, но се правдаат оти чекале автентично толкување на неколку членови од Законот од Кабинетот на претседателот.
Во меѓувреме и Синдикатот на културата обелодени дека вработени во службите за обезбедување, како и билетопродавачи, водичи и други работни позиции од неколку Национални установи од Скопје и внатрешноста, кои минатиот месец работеле во недела, не го добиле законски утврдениот додаток за одработениот ден.
(Б.Божиновска)