Седумнаесет деца починале од сипаници во Романија од септември минатата година, а илјадници други се заболени од оваа заразна болест, откако од 2016 та година земјата е погодена од сериозна епидемија поради ниското ниво на вакцинираност.
Најнова жртва е девојче од две и пол години од градот Сату Маре во северниот дел на земјата.
Починатите деца не биле вакцинирани, соопшти министерот за здравство, Флоријан Бодог.
Од февруари минатата година од оваа болест се заразени 3.400 луѓе. Една година претходно имало седум случаи на заразеност, без ниту еден смртен случај.
Министерството за здравство го повика населението да се вакцинира.
„Ова е единствениот ефикасен начин да се спречи болеста“, рече Бодог. Тој објасни дека вакцинирањето на населението од мали сипаници е 80 проценти за првата доза и 50 отсто за втората.
Светската здравствена организација (СЗО) препорачува стапка на вакцинација од 95 отсто.
Причините за оваа појава лежат во сиромаштијата, недостапноста на здравствените услуги, но и од зголемениот бројот на родителите што одбиваат да ги вакцинираат своите деца.
Според Европскиот центар за превенција и контрола на болести во шест европски земји малите сипаници се ендемски: Белгија, Франција, Германија, Италија, Полска и Романија.