МЗТ Скопје ја одигра најслабата сезона во кошаркарската АБА лига. Македонскиот првак заврши како претпоследен, 13., на табелата како и во натпреварувачката 2014/15, но овојпат финишира со биланс од 8 победи и 18 порази како и екипата на Крка и опстана благодарение на подобриот скор во меѓусебните дуели.
„Металците“ загубија од Морнар, во Скопје, со 63:69 (по четвртини: 16:18, 15:17, 10:21, 22:13) во последниот меч без никакво значење за двата тима. Ако по двата воведни периода беше присутна неизвесност за победникот, тоа не беше случај по третиот. На четирите разлика од првото полувреме, гостите од Бар додадоа уште 11 и во завршните 10 минути влегоа со +15, а во нив, во еден момент, имаа и +17.
Иако МЗТ Скопје се доближи на -2 на минута до крајот (63:65), сепак, црногорскиот претставник покажа дека ја има контролата и со кошевите на Антабија Волер и Борис Бакиќ стигна до десетта победа во дебитантското учество во регионалното натпреварување. Тимот на Анте Назор и во последното коло одигра со премногу грешки, загуби дури 19 топки во што и лежи клучот за 18 пораз во сезоната.
„Покажавме две лица. Едно како треба да играме и друго како не треба. Одигравме и доста деконцентрирано, загубивме 19 топки што е навистина премногу. Останува да извлечеме поуки и мора да бидеме поконкретни и борбени од почеток до крај“, порача Анте Назор, тренер на МЗТ Скопје.
Ѓорѓе Дреновац со 21 поен беше најефикасен поединец на средбата. Сите останати во ростерот на МЗТ Скопје не успеаја до двоцифрен број кошеви. Такви ги имаше четворица на спротивната страна. Џонс уфрли 20, Бакиќ – 15 и беше прогласен за МВП на натпреварот, Волер – 12 и Радуновиќ – 10.
„Посакувавме со победа да ја завршиме сезоната во АБА лигата, но не успеавме. Почнавме некако во грч и доцна заигравме како што треба кога противникот веќе имаше недостижна предност. Сега треба да се насочиме кон домашното првенство во обид да ја одбраниме шампионската титула“, истакна Љубомир Младеновски по средбата.
МЗТ Скопје по петти пати беше дел од АБА конкуренција. Покрај освоеното 13 место во теовната сезона и во 2014/15, „металците“ заврши како седми во премиерната (2012/13), беа деветти во 2013/14 и десетти во 2015/16.
Покрај бледите изданија во јадранското кошаркарско друштво, МЗТ Скопје беше елиминиран и во полуфиналето во Купот на Македонија, па шампионатот останува единствен излез за спас на сезоната.