Бастијан Швајнштајгер се повлекува од европската фудбалска сцена и кариерата ќе ја продолжи во МЛС во екипата на Чикаго Фајр. Поранешниот капитен на германската репрезентација доби американска работна дозвола, но и одобрување од Манчестер јунајтед да потпише едногодишен договор со „фаерси“. До промоција во новата средина Швајнштајгер го делат само лекарските прегледи.
„Отсекогаш сум сакал да оставан позитивен впечаток. Моето заминување во Чикаго не се разликува од тоа. Разговарав со директорот Родригез и тренерот Пауновиќ и се уверив дека клубот има добра визија. Сакам да помогнам во тој проект“, изјави Швајни за локалниот весник „Трибјун“.
Американските медиуми пишуваат дека Швајнштајгер ќе потпише договор на една сезона според кој ќе заработи 4,5 милиони долари. Во Манчестер Ј. замина во 2015 година од минхенски Баерн и од тогаш одигра само 35 меча. За Германија има 121 настап и 24 гола. Беше еден од клучните играчи во составот на Јоаким Лев во освојувањето на титулата на СП 2014 во Бразил.