Никола Груевски и Мартин Протогер се следните функционери на ВМРО ДПМНЕ кои треба да се појават на распит за предметот „Титаник“ на Специјалното Јавно обвинителство, објави Телевизија 24.
Според информациите на Телевизијата, тие двајца се дел од функционерите со кои СЈО ја прошири истрагата за изборни нерегуларности.
Телма објави дека Груевски досега двапати го одложувал распитот, со тоа што преку своите адвокати испратил оправдување дека поради обврски не може да се јави во закажаниот термин. Втората покана била за понеделникот, но Груевски доставил известување дека ќе биде на конгресот на Европските народни партии во Малта. Иако Конгерсот на Малта почнуваше во средата, Груевски преку Истанбул замина два дена претходно, денот кога требаше да се појави во СЈО. Поради оправдувањето дека не може да дојде на распит, закажан му е нов трет термин за наредните денови.
На 28 февруари, обвинителката Катица Јанева изјави дека истрагата за предметот „Титаник“ е проширена за нови 17 лица за кривични дела против изборите и гласањето за кои постои основано сомневање дека се сторени во периодот од 2011 до 2014 година.
-Од преслушувањето на доставените аудио-фајлови кои досега не беа објавени беше утврдено дека 5 од осомничените лица делувале како создатели на групата, а се работи за функционери во власта. Останатите осомничени се членови на групата и се вработени како службени лица во повеќе државни органи, рече Јанева.
„Титаник“ е првата истрага на Специјалното јавно обвинителство и се однесува на изборни нерегуларности. Првоосомничени во процесот се екс министрите за внатрешни работи и транспорт и врски, Гордана Јанкуловска и Миле Јанакиевски, поранешниот генерален секретар на владата, Кирил Божиновски како и градоначалникот на Пустец, Едмонд Темелко.
Досега во СЈО се јавиле Јанкулоска и Јанакиески, актуениот министер за здравство Никола Тодоров, некогашниот генерален секретар на владата Кирил Божиновски, а во петокот бил и пратеникот Илија Димовски.
Груевски е осомничен и во уште еден предмет на СЈО, за насилставата во општина Центар за кој веќе има и судски процес и обвинение.