Откако НОВА ТВ обелодени дека неколкумина директори на театри низ Македонија немаат поднесено анкетни листови во Антикорупциската комисија, тројца од нив конечно ја ставија нивната имотна состојба на јавен увид . По неколку години директорување Дејан Пројковски, директор на „МНТ“, Игор Дурловски, директор на Македонска опера и балет и Јелена Жугиќ, директор на „Театар комедија“ деновиве доставиле имотни листови.
Оваа законска обврска се уште не ја исполниле Роберт Велјановски, директор на „Драмски театар“ и Благој Мицевски, директор на „Народен театар – Битола“.
Според анкетните листови директорката Жугиќ пријавила дека поседува стан во Скопје од 56 м2 што го купила пред две години во вредност од 70.000 евра. Жугиќ лани заработила 22.500 евра по основ на авторски права.
Директорот на МНТ, Дејан Пројковски, пријавил стан на брачен другар во Скопје од 101 м2 и земјиште во Долно Соње од 1540 м2. Пројковски вози Тојота Корола и Киа Соренто, а во банка има околу 10.000 евра.
Игор Дурловски, првиот човек на Македонска опера и балет, има куќа од 200.000 евра во Скопје, земјиште вредно 47.000 евра, а во возниот парк има џип Крајслер гранд бојаџер и Киа Спортаж. Игор Дурловски е директор на „Македонската опера и балет“ од ноември 2015 година. Тој во моментов е во први редови на протестите на „Иницијативата за заедничка Македонија“.
Како што објави НОВА ТВ, овие директори се на функција веќе неколку години, но Антикорупциската комисија за нив нема отворено постапка, ниту пак ги казнила за кршење на Законот за спречување на корупција. Според него, секој функционер, директор, член на Управен одбор во државна институција има законска обврска во рок од 30 дена од стапување на функцијата да поднесете анкетен лист во Антикорупциска. Доколку тоа не го стори, Антикорупциската комисија може да поведе постапка за испитување на нивната имотна состојба, а следува и казна од 500 до 1000 евра.