Алев Корун, австриски член на набљудувачката мисија на Советот на Европа, за радио ОРФ изјави дека постои сомневање дека на референдумот во Турција имало манипулација со 2,5 милиони гласачки ливчиња.
-Нерегуларностите можеле да го променат резултатот на турскиот референдум од неделата. Тука се работи за фактот дека законот исклучиво дозволува официјални коверти за гласање. Но највисоките авторитети одлучија, иако е противзаконски, да ги примат и ковертите без официјален печат, изјави Корун.
Турскиот претседател Реџеп Таип Ердоган вчера ги отфрли критиките на меѓународните набљудувачи истанувајќи дека гласањето на референдумот било „најдемократско гласање“, какво што досега не се случило во ниту една западноевропска земја.
Обраќајќи им се на приврзаниците во Анкара, Ердоган рече дека Турција ќе ги игнорира сите оценки на меѓународните посматрачи.
На референдумот, врз основа на 99 отсто од преброените гласови 51,3 отсто од гласачите биле за уставни промени, додека 48,3 биле против, соопшти синоќа изборната комисија, истакнувајќи дека официјалните резултати се очекуваат за 11 до 12 дена.
Меѓународните набљудувачи вчера соопштија дека кампањата воочи турскиот референдум за проширување на претседателските овластувања е спроведена во „нефер услови“, и дека самото пребројување на гласовите поминало со доцни процедурални измени со кои се отстранети клучните безбедносни норми.
Турското Министерство за надворешни работи во меѓувреме соопшти дека почетните наоди на меѓународните набљудувачи, кои го надгледувале референдумот, одразуваат пристрасност заснована на предрасуди.