По речиси две децении работа, во сабота својот последен број ќе го издаде весникот „Утрински весник“.
Љубиша Станковиќ, претседателот на синдикатот на весникот, на својот фејсбук ја објави веста за згаснување на „Утрински“.
„После цели 18 години, благодарение на лошото менаџирање на Срѓан Керим, во сабота, ќе згасне УТРИНСКИ ВЕСНИК”. Треба да се запамети името на оној кој ќе го погребе весникот!“, напиша Станковиќ на Фејсбук.
Според досегашните информации весниците „Утрински“ и „Вест“ ќе станат веб-портали со по неколку вработени, а останатите ќе завршат на улица.
Тој е еден од весниците кој го издава МПМ, чии новинари штрајкуваа поради неисплатени плати. Тие бараа средба со сопственикот Срѓан Керим, но неговата врата остана затворена за новинарите.
Во меѓувреме, отворена беше нова фирма, со слично име, Медиа Принт ДООЕЛ, кој објави неколку огласи за вработувања на новинари и уредници. Новата фирма близначка е во сопственост на Александар Динев, дел од актуелниот менаџмент на МПМ.
Како што пишува Призма, во Основниот суд Скопје 2 за 10 мај е закажано рочиште на кое ќе се одлучува дали фирмата „Графички центар“ ќе оди во стечај. Имотот на фирмата е замрзнат и преминат во рацете на привремен стечаен управник.
Како што дознаваме, предлогот за стечај бил предложен од две фирми, една тетовска и една бугарска, кои имале побарувања од „Графички центар“.
„Графички центар“ е сопственик на Медиа Принт Македонија (МПМ), издавач на весниците „Дневник“, „Утрински весник“, „Вест“, „Македонски спорт“, „Теа модерна“ и порталот „Телеграф“.
Сопственици на „Графички центар“, пак, се „Телеграф“ (со удел од 3,4 милиони евра) и „Мирекс“ на Срѓан Керим (со удел од 1,7 милиони евра).