Само една недела откако претседателот на Турција, Реџеп Таип Ердоган извојува тесна победа на референдумот за уставните промени, турските власти денеска уапсија повеќе од илјада наводни поддржувачи на Фетулах Ѓулен.
Рациите започнале од рани зори, а се трагало по преку три илјади осомничени. Досега се уапсени 1,013 осомничени во сите 81 турски провинции. Се барале вкупно 4,672 осомничени, но со оглед дека 1,448 веќе се во затвор, биле издадени налози за апсење на вкупно 3,224 луѓе.
Според најавите на министерот за внатрешни работи Сулејман Сојлу рациите во кои биле ангажирани околу 8.500 полицајци ќе продолжат.
„Тоа е важен чекор за турската република“, рече тој.
Во деветмесечната вонредна состојба воспоставена по пучот уапсени се околу 47 илјади луѓе. Турскиот парламент ја продолжи вонредната состојба за уште три месеци во пресрет на референдумот.
Турските власти го обвинуваат Ѓулен дека го испланирал неуспешниот воен пуч во јули 2016 година со цел да го симне од власт Ердоган, но тој ги отфрла обвинувањата.